Dásamlegar og ofureinfaldar eftirréttar tartalettur

Ég held að flestum detti helst í hug ömmumatur þegar þeir heyra orðið tartalettur, en hver man ekki eftir ömmu gömlu nota afgangshangikjöt með uppstúf í tartalettur?

Hér hins vegar ætlum við að poppa tartaletturnar smá upp og gera eitthvað nýtt og skemmtilegt úr þeim.

Hver segir að tartalettur þurfi eingöngu að vera fylltar með kjöti og sósu? Tartelettuskeljar eru í raun loftkennt mylsnukennt smjördeig sem má nota í ýmislegt.

Hér ætla ég að gefa ykkur uppskrift að tvenns konar dásamlegum eftirréttar tartalettum sem munu slá í gegn, ég lofa!

Ekki nóg með það að þær eru guðdómlega góðar heldur er ofureinfalt að gera þær og tekur ekki nema stutta stund. Auk þess er svo gaman að geta boðið upp á eitthvað nýstárlegt.

Höfundur er María Gomez.

Sjá meira á www.paz.is

Hver segir að tartalettur þurfi að minna á ömmu gömlu og vera fylltar með hangikjöti og uppstúf?

Sítrónutart tartalettur

Hér er um að ræða dásamlega góðar sítrónutart tartelettur með brenndu eggjahvítukremi, eða marengs réttara sagt, sem er svo brennt ögn með brennara.

Til þess að gera það þurfið þið að eiga Creme Brulée gasbrennara en þeir fást oft ódýrt í matvöruverslunum eins og Hagkaup eða Fjarðarkaup, mæli 100% með að fjárfesta í einum slíkum.

Fyllingin í þessum tartalettum er í senn passlega fersk og sæt. Skelin er gerð með dýrindis Luxus tartalettunum frá Humlum.

HRÁEFNI:

  • 1 pakki Luxus Humlum tartalettur 
  • 100 gr nýkreistur sítrónusafi úr ferskum sítrónum (ekki nota úr belg)
  • 2 egg
  • 1 eggjarauða
  • 100 gr sykur
  • Börkur af einni sítrónu
  • 50 gr smjör

Eggjahvítukrem (marengs)

  • 2 eggjahvítur
  • 40 gr sykur
  • 1/4 tsk cream of tartar eða vínsteinslyftiduft (er það sama)
  • Pínu ponsu salt

AÐFERÐ:

  1. Notið gler eða plastskál til verksins (ekki úr stáli)
  2. Setjið í skál öll innihaldsefnin, nema smjörið og hrærið saman með písk. Passið að raspa bara gula partinn af sítrónuberkinum alls ekki hvíta lagið
  3. Setjið skálina svo yfir vatnsbað (þ.e. setjið vatn í pott og skálina yfir án þess að botninn á henni snerti vatnið)
  4. Hitið vatnið yfir ögn hærra en meðalhita og hrærið í sítrónublöndunni allan tímann á meðan þar til hún þykknar í skálinni yfir pottinum á heitri hellunni
  5. Ég svindlaði smá og byrjaði á að nota handþeytara til verksins í skálina yfir pottinum. Þegar var komin mikil froða skipti ég yfir í písk og pískaði saman þar til blandan var orðin þykk eins og vanillubúðingur á vínarbrauði. Þetta er gert yfir vatnsbaðinu allan tímann og getur tekið allt að 10 mínútur, en passið að píska allan tímann. Verið þolinmóð. Oft þegar maður heldur að hún þykkni ekkert kemur það loks allt í einu
  6. Takið svo blönduna þegar hún hefur þykknað og sigtið hana í aðra skál. Setjið svo smjörið í og hrærið vel saman, varlega samt
  7. Hitið ofninn á 180 C° blástur og penslið tartaletturnar með sykurvatninu sem ég nefni efst
  8. Hellið svo sítrónublöndunni jafnt í hverja tartalettu og stingið í ofninn í 10 mínútur
  9. Gerið næst eggjahvítukremið en það er best að gera það rétt áður en á að bera þær fram
  10. Þá eru eggjahvítur, cream of tartar og salt sett í hrærivél og þeytt þar til byrjar að þykkna ögn
  11. Byrjið þá að setja sykurinn í smápörtum út í eins og 2 msk í einu og þeytið stöðugt á meðan þar til kremið er orðið alveg hvítt og stíft, ættuð að geta hvolft skálinni án þess að það haggist
  12. Þegar tartaletturnar hafa kólnað er kreminu sprautað ofan á og brennt með brennara
Súkkulaði og karamellu tartalettur

Ég ætla líka að gefa ykkur uppskrift að geggjuðum súkkulaði og karamellu tartalettum, þið munuð ekki trúa því hversu auðveldar þær eru en þær er hægt að gera á nánast korteri.

Í þær notaði ég minni útgáfuna af tartalettunum frá Humlum, eða þessar hefðbundnu, jafnvægið milli skorpu og fyllingu er fullkomið.

Ég verð að segja að ég er ótrúlega ánægð með útkomuna á þessum dýrðar tartalettum og hvet ég ykkur til að prófa að gera þær, helst báðar eða í það minnsta þá sem þér lýst best á.

Til að gera tartelettuna sætari penslaði ég þær með sykurvatni og setti í ofn, við það urðu þær sætar og afar léttar undir tönn.

HRÁEFNI:

Súkkalaði ganache:

  • 1 pakki hefðbundnar Humlum tartalettur
  • 170 gr dökkt súkkulaði
  • 120 gr rjómi
  • 25 gr smjör
  • 1/2 tsk fínt borðsalt

Karamellu ganache:

  • 1×150 gr poki fjólubláar Walkers karamellur (ekki súkkulaðihúðaðar)
  • 1/2 dl rjómi
  • 1 tsk gróft salt

AÐFERÐ:

  1. Byrjið á að pensla tartaletturnar með sykurvatninu hér að ofan
  2. Setjið þær í 180 C°heitan ofn í 8-10 mín og hafið þær tómar
  3. Brytjið súkkulaðið í bita og setjið smjör með í grunna víða skál
  4. Hitið nú rjómann með salti í potti alveg upp að suðu og hellið yfir súkkulaðið í skálinni
  5. Hrærið vel saman þar til verður silkimjúkt og glansandi
  6. Bræðið næst karamellur og rjóma með saltinu saman í potti þar til verður silkimjúkt og glansandi
  7. Hálffyllið svo hverja tartalettu með súkkulaði ganache og leyfið henni að standa í smá stund
  8. Setjið karamellu ganache yfir og fyllið tartalettuna alveg upp að brún
  9. Mér finnst best að setja þessar tartalettur í hálftíma í frysti og þá eru þær til. Það má líka græja þær fyrirfram og geyma í kæli yfir nótt
Recommended Posts

Start typing and press Enter to search